1Cor 2 | ASO | STEP | Neze zuhokizo, naza lengita ogo O'moso'mi gamazi suno' minine' lo-lingimuvoni' nene a'mine O'moso'mo okodine di dizamilo line' gamazilo' e'meto evene' dizi minavete laa' adi'mino lamo gamazi monovo gilaa' avetevo' gililizado' nene lo-lengemamuvoni' ve.

1 Corinthians 2

Paulo' Aza Kilisito'ni Lohoto' Zalo' Bilani' Monovo Lo-ngimine'

1 Neze zuhokizo, naza lengita ogo O'moso'mi gamazi suno' minine' lo-lingimuvoni' nene a'mine O'moso'mo okodine di dizamilo line' gamazilo' e'meto evene' dizi minavete laa' adi'mino lamo gamazi monovo gilaa' avetevo' gililizado' nene lo-lengemamuvoni' ve. 2 Ido' ne'mine uvoni' nene nanitekumu' ve. Naza lengita uvoni' nene gamazi atokumu' mo ga'ne gelamolove lo asi Izesu' Kilisito'nimukisi ido' lohoto' zalo' hiline' monovomukisivo' nene lo-lengemelove losa uvoni' ma neive. 3 Ido' naza lengikisi minuvoni' gameneu' nene amuzo'nesi nomine' mino nehelele goloso izivo luvoluvo izosa minuvoni' ve. 4 Ido' mono' gamazi lo-lengemelesa uvoni' nene lingine gili ele'vole' ili ma O'moso'mi amuzo nene a'mine gamazi luvongu' neive li gili ele'vole' ilizanako otohato gamazi laa' avete laa' adi'mino noluvo lingine mene otohato gamazi nolize. A'mido' gele ele'vole' uke'zo li likelizave lo neni' gamazi lo-lengemaa' uvoni' nene lutine gatingu' gamazi ma do gosoho' o-lengedelone li gili mini otohato gamazi laa' avete laa' nani' ne'mino lutingu' hizo mono' lo-lengemamuve. Mono' gamazi lo-lingimuvoni' nene O'moso'mi Sikalahuli'mo hize ele' o-nidivosa ne'mi amuzo nene do soto' ogo lengelebizuvoni' ve.

O'moso'mi Gamazi Suno' Minine' Nene Sikalahu'veli'mo Lo Soto' Oga' Neive Lo Paulo' Lo-ngimine'

6 Lamine' laza evene' ma monoku' amuzo mili lodive igi nizavo mono' lo-ngemelone' gameneu' nene otohato gamazisi ha lo-ngemeloba me misubou' alevesi guve'inesi vesi engi' amuzo'ine nene mo osu' lolosa neine' nenako nemu' ingine otohato gamazi laa' ani' ne'mino lamo atoli'mine lolosune. 7 O'mosolati' otohato gamazi suno' minine' nene lolosune. A'mine gamazi nene O'moso'mo leli' atoli'mine ogo do lamine' o-ledelesa olihe okulumo' misubo do soto' amo minidati' salani molo-ledavo hito minine' ve. 8 Ido' me misubou' aleve gizebo i-ngidaa' ave guve'inesi ve hamolitesi a'mine suno' gamazi nene ma gilamani' ve. Ido' ma gili minadiniko Guvelesi ve atoli'mine ogo dizo minive nene lohoto' zalo' nene ma bili hilamadine. 9 Ee, gomu' a'mine otohato gamazi nene suno' minine'za idise leli' nene mo gelekune. O'moso'mi Sikalahu' ne'mo inite' muki' nene do soto' oga' neive. Ido' O'moso'mi monovo danava hito neine' nesi nene do soto' ogo ningaa' neine' nenako O'moso'mo a'mine Sikalahu've nene imiselavo a'mine ne'mo nene O'moso lute emaa' une' aleve leli' do va'va' o-lidine' inite' lamine' nene idise lelebizave. A'mine inite' lamine' do va'va' o-lidingumu' nene mono' godolou' ti' li gizi nizani' ma neive:

Evene' hamolitesi ve'inedunu' ningamani' initekisi
ido' li soto' amavo a'minemu' ma gilamani' initekisi
ido' ga'ine gili hehe laa' angu' ogo soto' amivo
olihe gilamani' initekisi nene O'moso'mo leli' lute emaa' une' aleve nene do va'va' o-lidine' ma neive.
Ne'mine li gizi nizani' ma neine'za idise nene Sikalahuli'mo a'mine gamazi nene lelebizavosa lo soto' oga' noune. 11 Ne'mine oga' noune'za evene' lelikuti' ve mali'mo ve mali'mi monovolo nene mo ningo gelamoloseive. Evene' ei' Sikalahu've ne'movo' nene evene' ne'mi lulou' mino monovolo've nene ningo gele mineleseive. A'mine'mine ogo ve mali'mosi O'moso'mi monovo danava nene ningamive. Asi've O'moso'mi Sikalahu' ne'movo' nene O'moso'mi monovo danava've nene ningaa' neive. 12 Ido' Kilisito' evenele leze Sikalahute nene me misubou' soto' ine' nomive. Laza O'moso'mo inite' ato ato' nolehize-lidine' nene a'minemu' ningo geleloningumu' ve losa O'mosolati' do ogo do ti' une' ne neive. 13 Ido' aposolo laza a'minemu' lo soto' ogo nolune' nene evene' angise'inemu' laza nene gate gele otohato oga' nounive nene none laa' navete li-limaa' nani' gamazilo' nene e'metamune. Sikalahuli'mo lo-limidokovo' nene e'metosa apize lengemaa' noune. Ido' O'moso'mi Sikalahu' engita minine' evene' vai' nene Sikalahuli'mo lido' e'meto gamazi nene lo ngolo' lo lo-ngemaa' noune. 14 Ido' O'moso'mi Sikalahuli'mo lelebizaa' neine' gamazi'mi monovo nene a'mine Sikalahu' ne'mo lute gate've do lapa nomine' o-ledavo ize' molo gelelonido' oga' neine' nenako evene' ma O'moso'mi Sikalahu' nomivo haza minaa' nave nete a'mine gamazi'mi monovo nene gililizado' minamivo nemu' nene negi gamazi ve li gili disa'mave. 15 O'moso'mi Sikalahu' lelita minine' aleve nene laza inite' mukikumu' nene leli' lute gatedunu' nene ha ize' molo gelelesune. Ne'mine olosune'za leli' lute gate nene evene' malite ngeli ize' mili lamilisave. 16 Ee, mono' godolo ne'mo a'minemu' ti' lo lo neine' ma neive:

Guvelesi ve gilidi'mino evene' zaho gele nolive.
Keke' hamolitesi mo gilamave.
Gilamanako aza ma gelamine' initekumu' nene
evene' zaho apize emelive.
Ti' lo lo neine'za O'moso'mi Sikalahu' ne'mo nene mo lelebizavo Kilisito' lulo galau' gilidi'mino nene leli' mo gele none. Ido' gele none' nemu' nene leli' lute gate nene evene' malite ngeli ize' mili lamilisave.